Пойтахтимизда шахмат бўйича “Таниш чеҳралар” турнири бўлиб ўтди.

Профессионал ҳамда ҳаваскор шахматчиларни бир жойда жамлайдиган ушбу анаънавий мусобақада бу йил Рустам Қосимжонов ҳам иштирок этди.  XVII Жаҳон чемпиони мусобақа давомида Республика ихтисослаштирилган болалар ва ўсмирлар шахмат мактаби ўқувчиларига қарши бир вақтнинг ўзида 20та шахмат тахтасида сеанс ўтказди.

Тадбир давомида ОАВ вакиллари ҳамда мухлислар иштирокида матбуот анжумани ҳам ташкил қилинди.

Келажакда юртимизда Рустам Қосимжонов номидаги шахмат мактаби очилиши мумкин.

“Мактабга ном бериш осон, аммо унинг ишини мунтазам тарзда юритиш қийин. Бу ишни юқори савияга олиб чиқиш инсондан катта кучни талаб қилади. Мен мактаб очсам шунчаки номимни бериб, ишларни бошқа инсонга топширмоқчи эмасман. Шахматчи сифатида фаолиятимни тугатганимдан кейин, бу балки 5 йил, балки 10 йилдан кейиндир, ана ўшанда бу иш билан астойидил шуғулланаман” – деб таъкидлаб ўтди Қосимжонов.