Криштиану Роналду Португалия миллий жамоаси қароргоҳини ўзбошимчалик билан тарк этгани учун дисквалификациядан қочиб қутула олмайди. Бу ҳақда юрист Гонсалу Алмейда маълум қилди.

У Португалия Футбол федерациясининг низомига таянди. Унда бундай ҳаракатлар учун қўлланиладиган жазо чоралари аниқ белгилаб қўйилган.

«Федерациянинг интизом кенгаши томонидан иш очилиши керак. Унда томонларнинг тортишув тамойили инобатга олинган ҳолда, Криштиану хабардор қилинади ва ўз позициясини билдириш имкониятига эга бўлади. Шундан сўнг қарор чиқарилади ва менимча, бу қарор жуда тез қабул қилинади», — дея Алмейданинг сўзларини A Bola келтирди.

Юристнинг таъкидлашича, дастлаб футболчини миллий жамоа сафида иштирок этишдан четлатишлари керак. Аммо амалда бу аллақачон амалга оширилган.

Роналдунинг ўзи ҳам аввалроқ жазони қабул қилганини билдириб, келажакда миллий жамоага фойда келтиришга тайёр эканини таъкидлаган.