“Nasaf” – “Bunyodkor” jamoalari o‘rtasidagi uchrashuv nihoyasiga yetgach, o‘yin yakunlariga bag‘ishlangan matbuot anjumanining dastlabki qismida “Bunyodkor” jamoasi bosh murabbiyi Mirjalol Qosimov ishtirok etdi va o‘yin haqidagi fikrlarini bildirib o‘tdi.

"Bugun bir-biriga munosib ikki jamoa ishtirokida ajoyib o‘yinni guvohi bo‘ldik. O‘yin asabiy kechganini ham ta’kidlab o‘tgan bo‘lardim. “Nasaf”ga qarshi mehmonda o‘ynash juda og‘ir. Shunga qaramasdan yigitlar bor imkonlarini ishga solib, harakat qilishdi. Muhimi uch ochkoni qo‘lga kiritdik. Ikkinchi bo‘limdagi vaziyatda agar Chemirtan gol ura olganida balki o‘yin bunchalik asabiy kechmasdi. “Nasaf” jamoasi haqida yaxshi fikrlarni aytishim mumkin. Tarkibda kuchli futbolchilar bor. Murabbiy futbolchilarga doimo imkon beradi. Bunda har qanday futbolchi o‘zini ko‘rsatishi kerak. Ba’zan futbolda omad ham kerak bo‘ladi.

Eldor Shomurodov haqida fikrim? Men faqat unga omad tilayman. Uni kamroq maydonga tushayotganiga sabab, albatta murabbiy uni yaxshi o‘rgansa, ko‘proq imkon beradi. Bunga ozroq  vaqt kerak bo‘ladi", — dedi Qosimov.