Oliy liga 18-turidan o‘rin olgan «Dinamo» - «Paxtakor» (0:0) uchrashuvidan so‘ng, «Paxtakor» bosh murabbiyi Shota Arveladze jurnalistlar savollariga javob qaytardi.

- O‘yin borasidagi fikrlaringiz bilan o‘rtoqlashsangiz?

- Avvalambor, raqibimiz «Dinamo» jamoasini o‘z navbatida e’tirof etish kerak, ular jiddiy qarshilik ko‘rsatib, maydonda kurashishga majbur eta olishdi. Umuman olganda, biz o‘z o‘yinimizni har bir bahsda ham namoyish etolmayapmiz. Shunga qaramay, har bir ochko uchun jiddiy kurash olib borishimizga to‘g‘ri kelayapti. Ko‘rsatayotgan o‘yinimiz yoqadimi yoki yo‘q shogirdlarim bugun oxirigacha kurash olib borishdi. Ular bugun 90 daqiqa turib berishdi. Bu bizning standart o‘yinimiz emas, bu men yigitlardan har hafta talab qiladigan o‘yin emas. Biz o‘yinimizni yaxshilashimiz lozim.

- Umuman olganda, «Dinamo»dan qanday o‘yin kutgan edingiz?

- Oldingi o‘yinlardan kelib chiqib, «Dinamo»ning agressiv futbol bilan qarshi hujumlar orqali o‘ynashini kutgan edim. Chunki ularda juda tezkor hujumchilar bor. «Dinamo» men kutmagan darajada o‘ynadi demagan bo‘lardim. Meni ko‘proq «Paxtakor» hayratlantirdi. Chunki bugun birinchi bo‘limda biz har bir ikkinchi to‘p oshirishni «Dinamo»ga yutqazdik. To‘pga birinchi bo‘lib egalik qilishda yutqazdik. Aynan shu tufayli o‘yinimizda muammolar kelib chiqdi.

- Ikki ochko yo‘qotildimi yoki bir ochko qo‘lga kiritildi?

- Bu savol o‘yindan oldin berilganda ikki ochko yo‘qotdik degan bo‘lardim. O‘yindan keyin esa aytishim mumkinki, bugun 1 ochkoni qo‘lga kiritdik.

- Shota, Samarqandga ilk bor tashrif buyurdingiz. Taassurotlaringiz qanday?

- Chindanam, ushbu ajoyib shaharga ilk bor tashrif buyurdim. Vaqt tig‘izligi bois ko‘hna shaharning diqqatga sazovor joylarida bemalol sayr qila olmadim. Umid qilamanki, menda Samarqandni ziyorat qilib ketish uchun yana vaqt bo‘ladi va men bu yergaga kelib, qadimiy shaharga sayyohat qilaman.