Gamburgda davom etayotgan boks bo‘yicha jahon chempionatida uchinchi sportchimiz final yo‘llanmasini qo‘lga kiritdi.

Vazni 52 kg.gacha bo‘lgan Jasurbek Latipov yarim finalda koreyalik Kim Inkyuga qarshi jang olib bordi. Raqib bokschisi bo‘yi va qo‘llari uzun bo‘lishiga qaramay, o‘zbekistonlik charm qo‘lqop ustasi to‘g‘ri taktika evaziga Kimga hech qanday imkoniyat qoldirmadi. Inkyu bir marta zarba berishga uringan paytda Jasur 2-3ta aniq zarbalarni raqib gavdasiyu boshi aralash yog‘dirdi.

Natijada hakamlarning barchasi o‘z ovozlarini Latipovga berishdi — 5:0 (30:26, 30:27, 30:27, 30:27, 29:28). Hamyurtimiz ertaga, 2 sentyabr kuni finalda kubalik Yosbani Veytiaga qarshi ringga ko‘tiriladi.