JCH–2018 turniriga saralash bosqichi so‘ngi – 10-turida O‘zbekiston terma jamoasi Janubiy Koreya futbolchilariga qarshi bahs olib boradi. JCH yo‘llanmasi hal bo‘ladigan mazkur uchrashuv oldidan O‘FF matbuot xizmati jamoalar o‘rtasidagi o‘yinlar statistikasi, yo‘qotishlar va uchrashuv rasmiylari haqida ma’lumot beradi.
O‘zbekiston – Janubiy Koreya uchrashuvi bugun, 5 sentyabr kuni Toshkentdagi “Bunyodkor” stadionida bo‘lib o‘tadi. Bellashuv mahalliy vaqt bilan soat 20:00 da boshlanadi.
O‘zaro uchrashuvlar
Jamoalar bugungi kunga qadar 14 uchrashuvda to‘qnash kelgan. O‘zbekiston termasi atigi 1 marta, 1994 yilgi Osiyo o‘yinlari yarim finalida koreyaliklarni mag‘lubiyatga (1:0) uchratishga muvaffaq bo‘lgandi. O‘shanda jamoalar birinchi bor bir-biriga ro‘baro kelgandi.
Janubiy Koreya termasi 14 uchrashuvdan 10 tasida zafar quchgan bo‘lsa, 3 o‘yinda durang qayd etilgan. Quyida jamoalar o‘rtasidagi oxirgi 5 o‘yinda qayd etilgan natijalar bilan tanishing.
11.09.2012 O‘zbekiston – Janubiy Koreya 2:2 | JCH–2014 saralashi
11.06.2013 Janubiy Koreya – O‘zbekiston 1:0 | JCH–2014 saralashi
22.01.2015 Janubiy Koreya – O‘zbekiston 2:0 | Osiyo Kubogi–2015, chorak final
27.03.2015 Janubiy Koreya – O‘zbekiston 1:1 | O‘rtoqlik o‘yini
15.11.2016 Janubiy Koreya – O‘zbekiston 2:1 | JCH–2018 saralashi
Jamoalar o‘rtasidagi so‘nggi bahsda Janubiy Koreya JCH–2018 saralashi doirasida o‘z maydonida O‘zbekistonni 2:1 hisobida mag‘lubiyatga uchratgadi.
Yo‘qotishlar
O‘zbekiston terma jamoasi safida Marat Bikmayev bo‘lajak o‘yinda maydonga tusha olmaydi. “Lokomotiv” a’zosining sariq kartochkalari to‘planib qolganligi bois u diskvalifikasiyaga uchradi.
Janubiy Koreya termasi safida katta ehtimol bilan “Suonsi” yarim himoyachisi Ki Son Yon maydonga tusha olmaydi. 28 yoshli futbolchi jarohatidan butunlay tiklanib ulgurmagan.
Uchrashuv rasmiylari
Singapurlik Muhammad Taqi al-Ja’fariy bin Jahariy bosh hakami bo‘lib ishlaydi. Unga qanotlarda hamyurtlari Tzu Liang Li va Min Kiat Ronni Ko yordam beradi. To‘rtinchi hakam vazifasini Xu Chuan Fu bajaradi.
Hakamlar nazoratchisi etib bahraynlik Jasim Muhammad Mahmud Abdulkarim tayinlandi. Uchrashuv komissari – Salmon Muhammad Namshan (Saudiya Arabistoni).
Guruhdagi vaziyat
JCH–2018 turniriga saralash bosqichi 9-turidan keyin JCHga yo‘llanma olgan Eron hisobida 21 ochko mavjud. Ikkinchi pog‘onada borayotgan Janubiy Koreya hisobida 14 ochko bor. Suriya 12 ochko va +1 ko‘rsatkich bilan uchinchi o‘ridan joy oldi. O‘zbekiston termasi 12 ochko va -1 to‘plar nisbati bilan 4-o‘rinda bormoqda. Guruhda 5–6 o‘rinlarni mos ravishda Xitoy (9 ochko) va Qatar (7 ochko) egallagan.
| № | Jamoa | O‘yin | G‘alaba | Durang | Mag‘lubiyat | T-N | Ochko |
|---|---|---|---|---|---|---|---|
| 1 | Eron | 9 | 6 | 3 | 0 | 8-0 | 21 |
| 2 | Janubiy Koreya | 9 | 4 | 2 | 3 | 11-10 | 14 |
| 3 | Suriya | 9 | 3 | 3 | 3 | 7-6 | 12 |
| 4 | O‘zbekiston | 9 | 4 | 0 | 5 | 6-7 | 12 |
| 5 | Xitoy | 9 | 2 | 3 | 4 | 6-9 | 9 |
| 6 | Qatar | 9 | 2 | 1 | 6 | 7-13 | 7 |
“A” guruhi 10-turning qolgan o‘yinlari
Yuqorida ta’kidlanganidek, saralash bosqichining so‘nggi turida O‘zbekiston termasi o‘z maydonida Janubiy Koreyani qabul qiladi. Qatar o‘z uyida Xitoyga qarshi bahs olib borsa, Suriya Tehronda Eron bilan kuch sinashadi. Barcha o‘yinlar bir vaqtda boshlanadi.
JCH–2018 saralashi
“A” guruhi, 10-tur
20:00 O‘zbekiston – Janubiy Koreya
20:00 Qatar – Xitoy
20:00 Eron – Suriya
Izoh: Uchrashuv soatlari Toshkent vaqti bilan ko‘rsatilgan.
