«Olmaliq» klubi hujumchisi Kamoliddin Murzoyev «Erudit Sport» gazetasiga bergan intervyusida milliy terma jamoamiz o‘yini borasida to‘xtalib o‘tdi.
«Milliy terma jamoamizda eng yaxshi futbolchilar saralangan, nazarimda. Hammasi joy-joyiga qo‘yilgan. Boshqa klublarda ham yaxshi futbolchilar borligini inkor etmayman. Ammo ularning hech birini milliy terma jamoamizdagi o‘yinchilardan o‘yin mahorati yoki boshqa jihatlardan ustun emas! Deylik, Marat Bikmayev milliy terma jamoamizda bo‘lmasa edi, unda nega bu futbolchi yo‘q degan e’tirozni bildirish mumkin edi. Hozircha hammasi joyida. Hujumchi sifatida terma jamoamizdagi hujum chizig‘idagi o‘yinchilarning mahoratini yuqori baholayman. Milliy terma jamoaning hujum chizig‘idagi uch o‘yinchidan qaysi biri chiqishi murabbiyga bog‘liq. Hozirda terma jamoa nafaqat muxlislar, balki barchaning daldasiga muhtoj. O‘yinda g‘alaba qozonishimiz shart. Jahon Chempionatiga chiqish har bir futbolchining orzusi. Shunday ekan, terma jamoamiz futbolchilari bor kuch va imkoniyatlarini ishga solishlariga ishonaman» — deydi «Olmaliq» klubi hujumchisi Kamoliddin Murzoyev.
