"Barselona" klubi himoyachisi Jerar Pike Ispaniya terma jamoasidagi faoliyati borasida bir qarorga kelganini e’lon qildi.

"Hozirgi paytda Ispaniya terma jamoasini tashlab ketish to‘g‘ri ish bo‘lmasdi. Agar terma jamoadan ketsam, menga nisbatan hushtakbozlik qilgan insonlar haqligini isbotlagan bo‘laman. Ispaniyadagi ko‘p odamlar ular kabi fikrda ekaniga ishonmayman. Men vaziyatni o‘zgartirishni istayman. Ispaniya terma jamoasidagi futbolchilar ham mening qolishimni istashadi.

Ushbu vaziyat qalbimga og‘riq beradi. Termadagi jamoadoshlarim o‘zlariga nisbatan hushtakbozlik qilinganiga munosib emas. Bunga chek qo‘yish oson bo‘lmasligini tushunib turibman.

Men Ispaniya terma jamoasidagi faoliyatimni Jahon chempionatidan keyin ham davom ettirishni rejalashtirgandim. Terma jamoani bunday tarzda tark etishni istamayman. Men 15 yildan beri terma jamoa safida o‘ynab kelyapman. Bu mening oilam. Ispaniyaga qarshi g‘arazim yo‘q.

Ispaniya aholisining bir qismi ushbu davlat tarkibidan chiqishni istagandi. Siyosatchilar o‘z ishlari bilan shug‘ullanib, bu masalani hal qilishlari kerak. Kataloniya – o‘z uyini tark etmoqchi bo‘lgan 18 yoshli o‘smir. Ispaniya hukumati muzokaraga kirishishi kerak. Aks holda o‘g‘il uyni tark etadi. Eng muhimi — o‘zaro hurmat va muzokara", - dedi Pike maxsus tashkil etilgan matbuot anjumanida.

Eslatib o‘tamiz, 1 oktyabr kuni Kataloniyada referendum bo‘lib o‘tdi. Ispaniya hukumati mazkur referendumni noqonuniy deb atab, polisiya yordamida ovoz berish jarayonini to‘xtatishga harakat qildi. Huquqni himoya qilish organlari va mahalliy aholi o‘rtasidagi to‘qnashuvda 700 kishi jabr chekdi.