9 noyabr kuni oliy liga 28-turida "Paxtakor" Toshkentda "Olmaliq" bilan maydonga tushadi.
Mazkur o‘yin jamoamiz uchun joriy mavsumdagi so‘nggi uy bellashuviga aylanadi. Shu sababli futbolchilarimiz muxlislarni xursand etishga astoydil harakat qilishadi.
Jamoalar milliy chempionatlarda o‘zaro 19 uchrashuvda to‘qnash kelishgan. "Paxtakor" hisobida 13 g‘alaba, 2 durang va 4 mag‘lubiyat mavjud. Raqib darvozasi 28 bor ishg‘ol etilib, 12 to‘p o‘tkazib yuborilgan. Toshkentdagi o‘yinlarda 6 g‘alaba, 2 durang va 1 mag‘lubiyat qayd etilgan.
Siz ushbu uchrashuvga tashrif buyurib, ko‘plab sovg‘alarga ega chiqish va ularni jahon futboli afsonasi, “Barselona” klubining sobiq himoyachisi Karles Puyoldan qabul qilishingiz mumkin. U ishqibozlarga futbol to‘plari va futbolkalarni taqdim etadi.
Shuningdek, siz jamoalarning keskin to‘qnashuvidan tashqari 2ta "IPhone 7 32 GB" telefoni va 3 dona "Artel" televizorlariga ega bo‘lish imkoniyatini qo‘lga kiritasiz. O‘yinning tanaffus payti va uchrashuv yakunlangandan so‘ng o‘tkaziladigan aksiyada chipta va abonement sohiblari ishtirok etishadi.
O‘yinni Ahrol Risqullayev boshqaradi. U oliy ligada ilk marta jamoamiz ishtirokidagi uchrashuvda ishlaydi.
"PAXTAKOR" - "OLMALIQ"
Hakamlar: Ahrol Risqullayev (Toshkent), Bobur Qodirov (Buxoro), Abdurahmon Qo‘ldoshev (Buxoro), Elyor Tursunov (Buxoro).
Nazoratchi: Ibrohim Sharipov (Buxoro).
PFL vakili: Baxtiyor Mametov.
Uchrashuvdan avval ishqibozlar uchun ko‘ngilochar dastur tashkil etiladi. 9 noyabr, payshanba kuni 16:00da boshlanadigan dasturdan so‘ng jamoalar maydonga tushib, 17:00da o‘yinni boshlab berishadi.
