Avval xabar berib o‘tganizdek, bugun 24 noyayur kuni Kataloniyaning “Barselona” va Argentina terma jamoasi Lionel Messiga to‘rtinchi marta “Oltin butsa” sovrini topshirildi.
Futbolchining to‘rtinchi marotaba ushbu sovringa ega bo‘lishi shu yilning may oyida aniq bo‘lgan edi, lekin sovrin faqat bugun o‘z egasiga topshirildi.
Sovrin topshirish marosimi Barselona shahrida bo‘lib o‘tdi. Messiga “Oltin butsa”ni “Barselona” klubidagi jamoadoshi Luis Suares topshirdi.
Ma’lumot o‘rnida, Lionel Messi o‘tgan mavsum Ispaniya La-Liga bahslarida 34 uchrashuvda maydonga tushib, 37 ta gol urgan va sovrin bo‘yicha o‘tkazilgna so‘rovnomada 74 ochko jamg‘arishga erishdi.
Ikkinchi pog‘onada “Sporting” klubi hujumchisi Bas Dost egallagan, uning hisobida 34 ta gol (68 ochko).
Kuchli uchlikni esa Dortmundning “Borussiya” klubi hujumchisi Pyer-Emerik Obameyang 31 gol va 62 ochko bilan yakunlab berdi.
Bundan oldin Messi Yevropa chempionatlarining eng yaxshi to‘purari sovrinini 2010, 2012, va 2013 yillari qo‘lga kiritgan.
Endilikda Messi ushbu sovrinlar bo‘yicha asosiy raqobatchisi Madridning “Real” klubi hujumchisi Krishtianu Ronaldu bilan tenglashib oldi.
