Rossiya Federasiyasi Prezidenti Vladimir Putin bugun, 1 dekabr kuni Moskvada bo‘lib o‘tadigan futbol bo‘yicha jahon chempionati musobaqasiga qur’a tashlash marosimida ishtirok etadi. Bu haqda Kreml Matbuot xizmati xabar bermoqda.
“Gosudarstvenniy Kremlyovskiy dvores” zalida bo‘lib o‘tadigan marosimga 1300 nafardan ortiq faxriy mehmonlar taklifnoma olishgan.
Mehmonlar orasida JCHda ishtirok etadigan 32 jamoaning 30 nafar murabbiylariga alohida joy ajratilgan.
Qur’a tashlash marosimi yakuniga ko‘ra, jamoalar guruhlaridagi raqiblarini bilib olish imkoniyatiga ega bo‘lishadi.
Marosim boshlanmasdan oldin Vladimir Putin Moskvaga kelgan jahon futboli namoyandalari bilan uchrashadi.
Ular ichida Nikita Simonyan, Diyego Maradona, Kafu, Fabio Kannavaro kabi sobiq futbol yulduzlari ham bo‘ladi”, – deyiladi Kreml xabarida.
Ma’lumot o‘rnida aytib o‘tish joizki, 2018 yil Rossiyada bo‘lib o‘tadigan futbol bo‘yicha jahon chempionatining final bosqichiga qur’a tashlash marosimi bugun, 1 dekabr kuni Moskvadagi “Gosudarstvenniy Kremlyovskiy dvores” zalida o‘tkaziladi.
Marosim jarayonini Angliya terma jamoasining sobiq futbolchisi, ayni paytda futbol eksperti hisoblanmish Gari Lineker va boshlovchi Mariya Komandnayalar birgalikda olib borishadi. Taniqli aktyor Ivan Urgant marosimda boshlovchi vazifasini bajaradi.
JCH–2018 final bosqichi 2018 yilning 14 iyun kunidan 15 iyul kuniga qadar Rossiyaning 11 shahri: Moskva, Sankt-Peterburg, Kazan, Sochi, Nijniy Novgorod, Samara, Kaliningrad, Yekaterinburg, Saransk, Volgograd va Rostov na-Donudagi 12ta stadionda bo‘lib o‘tadi.
Quyida JCH–2018da ishtirok etadigan jamoalarning to‘liq ro‘yxati bilan tanishing: Rossiya, Braziliya, Eron, Yaponiya, Meksika, Belgiya, Janubiy Koreya, Saudiya Arabistoni, Germaniya, Angliya, Ispaniya, Nigeriya, Kosta-Rika, Polsha, Misr, Islandiya, Serbiya, Portugaliya, Fransiya, Urugvay, Argentina, Kolumbiya, Panama, Senegal, Tunis, Marokash, Shveysariya, Xorvatiya, Shvesiya, Daniya, Avstraliya, Peru.
Eslatib o‘tamiz, qur’a tashlash marosimini “Sport” telekanali to‘g‘ridan-to‘g‘ri namoyish etishni rejalashtirgan.
