Endi Toshkentning «Lokomotiv» klubi ham ketma-ket mamlakat chempionligini qo‘lga kiritganlar qatoriga qo‘shildi. Bu bilan «temiryo‘lchilar» muxlislarini muborakbod etamiz.
G‘alabalar qatori sodiq ishqibozlar safi ham kengayib borishidan umidvormiz. Har holda, oxirgi ikki mavsumdan buyon chempionatimiz bayroqdori bo‘lib turgan jamoaga to‘lib-toshgan stadion yarashadi.
Bunga qadar faqat «Neftchi», «Paxtakor» va «Bunyodkor» shunday natija qayd eta olishgandi. Endi «Lokomotiv» ham ularning safiga qo‘shildi. O‘zbek futboli tarixida chempionlikka erishganidan so‘ng yo‘qlik sari g‘arq bo‘lgan klub bor - MHSK. Shuningdek, oliy ligada bir martagina g‘olib chiqib, keyin o‘rtamiyonalar safiga qo‘shilgan «Navbahor»ni ham unutmaslik darkor. «Loko»ni hozirdanoq tabriklash mumkin, zero bu jamoalardan farqli o‘laroq, ikki bora chempionlikni qo‘lga kirita oldi. Ammo «temiryo‘lchilar» bu ishni yana uddalay olisharmikan? Qiziq savol, shunday emasmi? Keling, unga javob qidirishga urinib ko‘ramiz.
JAVOB
Bu savolning javobini topish uchun «Lokomotiv»ning g‘oliblikka qanday erishganiga e’tibor qaratish lozim.
Jamoa ustozi Mirko Yelichich ham ta’kidlab o‘tganidek, «temiryo‘lchilar» joriy mavsumni barqaror o‘tkazishdi va chempionlikning asosiy omili ham shunda bo‘ldi.
Tan olish lozim, «Lokomotiv»ga bu yil qarshilik ko‘rsata oladigan jamoa ko‘rinmadi.
O‘tgan yillar davomida chempionga kimdir jiddiy kurash taklif etishiga ko‘nikib qolgandik. Masalan, «Bunyodkor» va «Paxtakor»ning bir-biri bilan mudom raqobatda bo‘lganini ko‘p ko‘rganmiz.
Shuningdek, «Nasaf» ham chempionlik uchun bo‘lmasa-da, har holda, sovrinli o‘rinlarga har doim da’vogarlik qilgan. O‘tgan yili «Lokomotiv» ilk bora g‘oliblikni qo‘lga kiritganda ham «ajdarlar» imkon qadar qarshilik ko‘rsatishga urinib ko‘rishgandi.
FARQ
