Xabaringiz bor, ortda qolgan haftada Yevropa chempionlar ligasi turnirining so‘nggi - 6-tur uchrashuvlari bo‘lib o‘tdi.
«Hechdan ko‘ra kech» deganlaridek bugun anashu bahslarda o‘rnatilgan rekordlar va turli faktlarni e’tiboringizga havola etishni lozim topdik.
11 - «Barselona» ketma-ket 11-marta guruh raundini 1-o‘rinda yakunladi - bu turnir tarixidagi rekorddir.
19 - «Real» to‘purari Krishtianu Ronaldu joriy yil davomida CHL o‘yinlarida naq 19ta gol urib, bu borada turnir rekordchisiga aylandi. Avvalgi eng yaxshi ko‘rsatkich ham aynan portugaliyalikka tegishli edi - 2015 yili 16ta gol.
Umuman, Krishtianu «Real» libosida CHLda 94-marta maydonga tushib, 99-golini nishonladi. Qolaversa, u guruh bosqichi doirasidagi 6ta o‘yinda ham gol urib, bunday natijaga erishgan birinchi futbolchi bo‘ldi.
25 - «Bavariya»ga 1:3 hisobida yutqazgan «PSJ» guruh bosqichida ko‘p gol urish bo‘yicha rekordchiga aylandi - 6ta o‘yinda 25ta (1ta o‘yinda o‘rtacha 4,2ta). Avvalgi rekord mavsum- 2016|2017da «Borussiya» D. tomonidan qayd etilgandi - 21ta gol.
100 - «Manchester Siti» bosh murabbiyi Xosep Gvardiola «Shaxtyor»ga qarshi o‘yinda CHLdagi 100-o‘yinini nishonladi. 100ta o‘yindan 61tasida g‘alabani ta’minlagan ispaniyalik murabbiy bu oraliqda 2 marta bosh sovrin yutdi.
Umuman, 46 yoshli mutaxassis 100ta o‘yin marrasiga yetgan 6-murabbiydir. Gvardiolagacha Aleks Fergyuson, Arsen Venger, Karlo Anchelotti, Joze Mourinyo va Mircha Luchesku o‘z klublarini CHLda 100 marta maydonga boshlab tushishgandi.
121 - Lionel Messi CHLda 121-marta maydonga tushib, bu borada Janubiy amerikalik futbolchilar orasida yaqqol peshqadamga aylanib oldi. Xullas, u 120ta o‘yinda ishtirok etgan Roberto Karlos (Braziliya)ni sof 2-o‘ringa surib qo‘ydi.
APL vajohati
CHL tarixida ilk marta bitta mamlakatning 5ta jamoasi «pley-off»da ishtirok etadi. Chunonchi, APL vakillari - «Liverpul», «Manchester Siti», «MYU» va «Tottenxem» o‘z guruhlarida g‘olib chiqishdi, «Chelsi» esa kvartetda 2-o‘rinni egalladi.
Bundan avval CHL 1|8 finalida bitta mamlakatning 4 jamoasi o‘ynashi 12 marta kuzatilgandi (Angliya - 6 marta, Ispaniya - 4 marta va Germaniya - 2 marta).
TEXNIK KO‘RSATKICHLAR
Darvoza tomon aniq zarbalar soni bo‘yicha yetakchi futbolchilar: DAVOMI
