2017 yilgi futbol mavsumi ancha qiziqarli va samarali tarzda yakuniga yetmoqda. Futbol bo‘yicha mamlakat chempionati va kubogi bahslari ham allaqachon nihoyasiga yetgan.
Shu munosabat bilan dekabr oyining 25-26 sanalarida Oliy Liga-2017 sovrindorlari medallar bilan taqdirlanishdi.
26 dekabrda “Lokomotiv” professional futbol klubi vakillariga O‘zbekiston chempionati oltin medallari topshirildi. O‘tkazilgan tantanali marosimda futbolimiz jamoatchiligi vakillari, futbol faxriylari, OAV vakillari ishtirok etishdi. Unda O‘FF Prezidenti Umid Ahmadjonov mamlakat chempioni va kubogi sohibi sanalgan “Lokomotiv” futbolchilari va murabbiylariga oltin medallarni topshirdi.
Ma’lumki, “Nasaf” futbol klubi bu yilgi chempionatda ikkinchi o‘rinni egalladi va o‘z tarixida ikkinchi marta kumush medalga sazovor bo‘ldi. 26 dekabr kuni Qarshidagi “Markaziy” stadionda kumush medallarni tantanali topshirish marosimi bo‘lib o‘tdi. Qarshilik futbolchilarga kumush medallarni Sardor Rahmatullayev tantanali ravishda topshirdi.
25 dekabr kuni esa “Paxtakor” futbolchilarini 2017 yilgi mavsumdagi medallar bilan taqdirlash marosimi bo‘lib o‘tdi. Unda ushbu jamoaga oliy ligada qo‘lga kiritilgan 3-pog‘ona uchun bronza medallarini O‘FF Prezidenti Umid Ahmadjonov va PFL direktori Omon G‘ofurov futbolchilar, murabbiylar shtabi va xodimlarga taqdim etishdi.
