Konki, klyushka, shlem va boshqa anjomlarlardan iborat Prezident sovg‘asi «Binokor» xokkey klubining yosh havaskor xokkeychilariga topshirildi. Bu haqda «Uzreport» AA xabar berdi.

2017 yil mamlakat qishki sport turlari tarixida rivojlanishning boshlanish davri sifatida yodda qoladigan bo‘ldi. Ayniqsa, Prezident Shavkat Mirziyoyev tashabbusi bilan «NUMO» sport arenasi qurilib, qishki sport turlariga oid 4 yangi federasiya tashkil etildi.

— Aytish kerakki, yaqin vaqt ichida O‘zbekistonda xokkey bo‘yicha musobaqalar tashkil etilishi rejalashtirilmoqda. 2020 yilda 7 yoshdan 16 yoshgacha bo‘lgan bolalar o‘rtasida mamlakat chempionatlari, 2022 yildan boshlab esa yoshlar o‘rtasida musobaqalar tashkil etiladi. Shuningdek, federasiya xalqaro musobaqalarda ham ishtirok etishni rejalashtirmoqda, — deydi O‘zbekiston xokkey federasiyasi bosh kotibi Shukrilla Karimov.