Turkiyadagi yig‘inda "Paxtakor" birinchi nazorat uchrashuvida yirik hisobda g‘alaba qozondi.
Turkiya uchinchi liga ishtirokchisi "Turgutluspor"ga qarshi maydonga tushgan “Paxtakor” 3:0 hisobida zafar quchdi. Birinchi bo‘limda to‘liq tashabbusga ega bo‘lgan "sherlar" ko‘plab qulay vaziyatlarni yuzaga keltirishdi. 12-daqiqada Kozak raqib darvozasini ishg‘ol qildi. Keyingi daqiqada Bezerraning faol harakatidan so‘ng Masharipov ikkinchi to‘p muallifiga aylandi. Bo‘lim oxirigacha futbolchilarimiz bir qator imkoniyatlardan foydalana olishmadi.
Ikkinchi bo‘limda tarkibda o‘zgarishlar yuzaga keldi. Lobanov ikki marta "Turgutluspor" a’zolarining penaltidan tepgan to‘plari yo‘liga g‘ov bo‘lib, mahoratini namoyish qildi. 84-daqiqada Sayfiyev o‘yinda hisobni yirik ko‘rinishga keltirdi.
Navbatdagi nazorat bellashuvini "Paxtakor" 11 yanvar kuni Turkiya ikkinchi ligasi vakili "Shanliurfaspor" jamoasi bilan o‘tkazadi.
"PAXTAKOR" - "TURGUTLUSPOR" - 3:0 (2:0)
Gollar: Kozak 12, Masharipov 13, Sayfiyev 84.
"Paxtakor": Suyunov (Lobanov, 46), Kozak, Simich (Andreev, 63), A’zamov, Shorahmedov (Sayfiyev, 63), Rahmatullayev (Ismatullayev, 63), Ahmedov (Ahmadov, 63), Masharipov (Ibrohimov, 63), Iskanderov (Sindarov, 63), Abdurahimov (G‘anixonov, 63), Bezerra (Hakimov, 63).
