“Metallurg” PFK prezidenti, “O‘zbekiston” metallurgiya kombinati Hissadorlik jamiyati Bosh direktori A.Xursanovning ko‘p millatli Bekobod shahri aholisi nomidan O‘zbekiston futbol assosiasiyasi birinchi vise-prezidenti U.Ahmadjonov nomiga yozilgan rasmiy xatiga binoan milliy chempionat Superligasining “Metallurg” – “Navbahor” uchrashuvi oldindan belgilangan 2 mart sanasidan 4 mart sanasiga ko‘chirildi.
Bunda, metallurglar shahri – Bekobod ahlining ishdan bo‘sh paytdagi asosiy dam olish maskani, hordiq chiqarish manzili “Metallurg” futbol klubi to‘p suradigan “Metallurg” markaziy stadioni ekanligi, ayni paytda ushbu maskanni mamlakat XXVII milliy chempionatiga tayyorlash borasida katta hajmdagi ishlar amalga oshirilayotganligi, O‘zbekiston metallurgiya kombinati ishchilarining dam olish kuni stadionga kelib, ko‘ngilli hordiq chiqarishlari, oilaviy dam olishlarini ta’minlash maqsadida “Metallurg” – “Navbahor” jamoalari uchrashuvini yakshanba kuniga, 2018 yil 2 mart sanasidan 4 mart sanasiga ko‘chirish, o‘z navbatida mazkur uchrashuvning boshlanish vaqtini dam oluvchilar uchun qulay bo‘lgan – 15:30 da boshlanishiga ruxsat berilishligi inobatga olingan.
