O‘zbekiston terma jamoasi bugun Marokashning Kasablanka shahrida Senegal termasiga qarshi o‘rtoqlik uchrashuvini o‘tkazdi.

Bahsning 21-daqiqasida afriklik himoyachi o‘z jarima maydonchasi ichida Sardor Mirzayevga nisbatan qo‘pollik ishlatdi. Tunislik hakam hech ikkilanmasdan penalti belgiladi. Otabek Shukurov 11 metrli jarima zarbasidan unumli foydalanib, hisobni ochdi.

O‘tkazib yuborilgan goldan keyin senegalliklar tezlikni oshirishdi va bir nechta xavfli hujumlar tashkil etishdi. Ularning urinishlari 64-daqiqada o‘z samarasini berdi. Mussa Konate darvozamiz yaqinida to‘pni egalladi, To‘xtaxo‘jayev ta’qibidan qochdi va kuchli zarba bilan o‘z maqsadiga erishdi.

Terma jamoamiz bu o‘yinda g‘alabani ilib ketishi mumkin edi. Zaxiradan maydonga tushgan Marat Bikmayev o‘yinning 84-daqiqasida bir himoyachini aldab o‘tib, 10 metrlardan kuchli zarba berdi. To‘p darvoza  to‘siniga tegib qaytdi.

Shu tariqa, O‘zbekiston terma jamoasi JCH-2018 ishtirokchisiga qarshi o‘rtoqlik o‘yinida durangga imzo chekdi. Terma jamoamiz navbatdagi o‘yinni 27 mart kuni Marokashga qarshi o‘tkazadi.

Xalqaro o‘rtoqlik uchrashuvi
SENEGAL - O‘ZBEKISTON - 1:1
Gollar: Mussa Konate (64) - Otabek Shukurov (pen. 21)
Senegal: 16.Pape Seydu Ndiaye, 21.Lamin Gassama, 4.Fallu Diagne, 13.Alfred Ndiaye, 2.Papi Jilaboji, 11.SHeyk Ndoye, 24.Assane Diousee, 25.Santu Ngom, 14.Mussa Konate, 19.Bay Umar Niasse, 27.Pape Suare
O‘zbekiston: Ignatiy Nesterov, Akmal Shorahmedov, Islom To‘xtaxo‘jayev, Anzur Ismoilov, Akrom Komilov, Otabek Shukurov (Ikrom Aliboyev 67), Odil Hamrobekov, Odil Ahmedov, Eldor Shomurodov (Sardor Rashidov 86), Sardor Mirzayev (Jaloliddin Masharipov 58), Temurxo‘ja Abduxoliqov (Marat Bikmayev 67)
Bosh hakam: Nuriddin Ja’fariy (Tunis)