Buyuk Zlatan Ibragimovich «MYU» bilan xayrlashib, okean ortiga yo‘l oldi. Xo‘sh, novcha shved APLda qanday iz qoldirdi? Unchalik yorqin emas, har holda, uning to‘liq kuch bilan o‘ynashiga jarohat atalmish «dushman» xaliqit berdi.

Aslida ekspertlar Ibragimovich bilan tuzilgan shartnoma «Yunayted» uchun oxirgi yillardagi eng omadlisi bo‘lishini taxmin qilishgandi. Ammo...

Jamoa safiga 2016 yili yozda qo‘shilgan Ibra barcha turnirlarda 53 marta maydonga tushib, 29ta gol urdi, 3ta sovrin yutdi. Shveddan eng ko‘p «nasiba»ni «Sautgempton» oldi - 4ta gol.

Manchesterda Romelu Lukaku paydo bo‘lganidan keyin esa, Joze Mourinyo nomdor goleadorga zaxira kuchi sifatida qaray boshladi. Misol uchun, u joriy mavsum Zlatanga atigi 193 daqiqa o‘ynash imkoniyatini berdi, xolos.

«Har qanday buyuk voqeaning ham yakuni bor. «Manchester Yunayted»da o‘tgan fantastik 2 mavsumdan keyin boshqa yo‘nalish bo‘yicha harakatlanish vaqti keldi. Barchaga rahmat. «Qizil» abadiy!» - bu Ibragimovichning xayrlashuv so‘zi.

Shvesiya futboli faxri endi faoliyatini AQSHning «Los-Anjeles Geleksi» klubida davom ettiradi. «Zlatan - top-saviya. Bunday o‘yinchilar MLSga kelishsa, liga o‘z-o‘zidan kuchayadi», - degan edi okean orti futbolining yevropalik qaldirg‘ochlaridan biri Devid Bekxem yanvar oyidayoq.

Zlatan Ibragimovich «Los-Anjeles Geleksi» ixtiyoriga borgani hamono antiqa ishga qo‘l urdi. Shvesiyalik mag‘rur futbolchi Los-Anjeles shahridagi qabul uchun minnatdorchilik bildirish maqsadida mahalliy gazetaning butun bir sahifasini sotib oldi.

Eng qizig‘i esa, katta sahifaga faqatgina 3ta ibora joylashtirildi: «Qadrli Los-Anjeles, arzimaydi». To‘g‘ri, buning ostida hujumchining ism-sharifi va imzosi ham bor.

Abdulloxon ISROILXONOV tayyorladi