“Bunyodkor” – “Metallurg” uchrashuvidan keyingi matbuot anjumanining birinchi qismida bekobodliklar ustozi ishtirok etdi.

- Raqib kim ekanligini yaxshi bilgan holda bahsga juda yaxshi tayyorgarlik ko‘rgandik. “Bunyodkor” musobaqa jadvalida bejizga peshqadamlik qilmayapti. Raqibni yaxshi o‘rganib chiqib, shunga munosib o‘yin uslubini tanlagandik. O‘yinni yomon boshlamadik va 55 daqiqa davomida futbol o‘ynadik. Keyin esa yo‘l qo‘ygan xatolarimiz evaziga jazolandik. Ortda qolgan beshta uchrashuvda atigi ikkita to‘p o‘tkazib yuborgandik. Bugunning o‘zida esa uchta to‘p qo‘yvordik. Xatolarimizni chuqur tahlil qilamiz va kerakli xulosalarni chiqaramiz. Superligadagi boshqa jamoalarga o‘z hurmatini saqlagan holda shuni aytishim mumkinki, “Bunyodkor”ning o‘yin uslubi va o‘z imzosi bor. Murabbiy ishlayapti va buni natijalar ko‘rsatib turibdi. Mirjalol Qosimov o‘z falsafasini jamoa o‘yiniga kirita olgan. “Bunyodkor” bugun haqli ravishda g‘alaba qozondi, - deydi Andrey Sergeevich.