“Bunyodkor” – “Metallurg” uchrashuvidan keyingi matbuot anjumanining ikkinchi qismida “qaldirg‘ochlar” ustozi qatnashdi.

- Bugungi g‘alabamizni jamoamizning marhum muxlisimiz Mamadali xoji ota Turdialiyevning xotirasiga bag‘ishlaymiz. U kishi asli jizzaxlik bo‘lishlariga qaramasdan jamoamizning nafaqat uydagi, balki safardagi bahslarini ham o‘tkazib yubormas edilar. Oxiratlari obod bo‘lsin. Ularning yaqinlariga, oila a’zolariga jamoamiz nomidan hamdardlik bildiramiz.
Bevosita o‘yinga to‘xtaladigan bo‘lsam, qiziqarli o‘tgan o‘yinda haqli ravishda g‘alaba qozondik. Lekin yutuqni osonlikcha qo‘lga kiritdik, demagan bo‘lardim. Raqib himoyalanib, asosan qarshi hujumlarga urg‘u bergan holda to‘p tepdi. Bunday uslub har qanday raqibga muammolar tug‘diradi. Birinchi bo‘limni yaxshi o‘tkazgan bo‘lsak-da, yakuniy zarbalarda aniqlik yetishmadi. Ikkinchi bo‘limda esa mehnatimizga yarasha mukofot oldik. Futbolchilarimiz chiroyli o‘ynashga harakat qilishyapti va shu orqali muxlislarni xushnud etishmoqda. Jamoaning hozirgi holati qanday bo‘lishidan qat’inazar, “Bunyodkor” o‘z saviyasidan pastga tushishi kerak emas. Hayot bir tekisda davom etmaydi. Lekin inson doimo yuqori marralarga intilib, mehnat qilishdan to‘xtamasligi lozim, - deydi Mirjalol Qo‘shoqovich.