Yakshanba kuni Angliya chempionligini qo‘lga kiritgan "Manchester Siti" voyaga yetmagan futbolchilar bilan shartnoma imzolash qoidasini buzgani uchun ikki muddatli transfer taqiqiga uchrashi mumkin.
Daily Mail xabariga ko‘ra, "shaharliklar" "Veles Sarsfild" o‘yinchisi Benjamin Garre bilan u 16 yoshga to‘lganidan bir nech kun o‘tib shartnoma imzolaganlar. Argentinaliklar bu bilan "Siti" 18 yoshga to‘lmagan futbolchilar bilan shartnoma imzolash taqiqlangan qoidani buzganligini aytishmoqda.
Ammo angliyaliklar hammasi qonun doirasida bo‘lganini ta’kidlamoqdalar, chunki Garreda Italiya pasporti bor. UYEFA qoidalariga ko‘ra, 16 dan 18 yoshgacha bo‘lgan futbolchilar, agar u Yevropa ittifoqi yoki Yevropa iqtisodiy ittifoqiga kiruvchi mamlakat fuqarosi bo‘lsa, boshqa klubga o‘tishi mumkin.
Yaqin yetti kun ichida arbitraj sudi bu borada xulosa chiqaradi.
