O‘zbekiston XXVII milliy chempionatining Superliga 10-turi doirasida Buxoroning  “Buxoro” klubi  o‘z maydonida Namanganning “Navbahor”  jamoasini qabul qiladi.

Mazkur klublar Superliga (oliy liga) bahslarida 50 marta bir-birlariga qarshi maydonga tushishgan. Ushbu 50 bahsdan 26tasida namanganliklar g‘olib chiqqan bo‘lsa, 16ta uchrashuvda buxoroliklar g‘alaba qozonishgan. 8ta o‘yinda esa tomonlar durangga imzo chekishgan.

To‘plar nisbati bo‘yicha ham ustunlik Ilhom Mo‘minjonov shogirdlari tarafida. "Navbahor" shu kunga qadar o‘zaro o‘yinlarda 94ta to‘p kiritib, o‘z darvozasidan 60 marta to‘p olib chiqqan. Mazkur jamoalarning o‘zaro bahslarida namanganliklar 86 ochkoni, “Buxoro” esa 56 ochkoni qo‘lga kiritgan.

O‘zaro uchrashuvlardagi eng yirik hisob 2001 yili kuzatilgan. O‘sha yili Namanganda o‘tkazilgan o‘yinda "lochinlar" 6:1 hisobida g‘alaba qozonishgan. Buxoroliklar 2009 yilgi mavsumda jamoamizni 3:0 hisobida mag‘lubiyatga uchratishgan.

"Navbahor" Buxoroda o‘tkazilgan so‘nggi 5 uchrashuvda faqat 1 marta mag‘lubiyatga uchragan, xolos. 2ta bahsda “lochinlar” zafar quchishgan bo‘lsa, yana 2ta o‘yinda durang hisobi qayd etilgan.

Buxoroda bo‘lib  o‘tgan so‘nggi besh uchrashuv:
2017 yil  -  “Buxoro” – “Navbahor” -  3:3
2016 yil - “Buxoro” -  “Navbahor” -  3:2
2015 yil -   “Buxoro” – “Navbahor” - 0:1
2014 yil -  “Buxoro” -  “Navbahor “ - 0:2
2013 yil -  “Buxoro”  - “Navbahor” - 1:.1

O‘zaro o‘yinlar haqida fakt: Buxoroda bo‘lib o‘tgan 25ta o‘yinning 12tasida mezbonlar, 8tasida mehmonlar g‘olib bo‘lishgan. 5ta uchrashuvda esa tomonlar murosa ko‘chasini tanlashgan. “Navbahor” oxirgi marta 2015 yili Buxorodan g‘alaba bilan qaytgan.

“Navbahor” PFK matbuot xizmati.