PEPSI O‘zbekiston Superligasi 12-turining qiziqarli o‘tishi kutilayotgan o‘yinlaridan birida “Lokomotiv” Navoiyning “Qizilqum” klubini qabul qiladi. 

Mazkur jamoalarning o‘zaro to‘qnashuvlari hamisha shiddatli ruhda o‘tib keladi. Jamoalar hozirga qadar milliy chempionatlarimiz tarixida 27 marta o‘zaro bahs yuritishgan. O‘yinlarning 16tasida “Lokomotiv” futbolchilari, 7tasida esa “Qizilqum” vakillari zafar quchishgan. Yana 4ta bellashuv durang natija bilan nihoyasiga yetgan.

“Loko” shu paytgacha ushbu raqib darvozasini 41 marta ishg‘ol etgan va o‘z darvozasidan 18ta to‘p o‘tkazib yuborgan. Jamoamizning “Qizilqum” ustidan qozongan g‘alabasi 5:0 bo‘lib, mazkur g‘alaba 2004 yilgi mavsumning ikkinchi davrasida qayd etilgan. O‘shanda “Jar” stadionida “Qizilqum”ni qabul qilgan “Lokomotiv” raqib darvozasini javobsiz 5 marta aniq nishonga olgan edi.