25 may kuni "Paxtakor" Superliganing 13-turida "Bunyodkor"ni qabul qiladi. Bellashuv "Paxtakor" stadionida 25 may, juma kuni soat 18:59da boshlanadi.
O‘yinga tashrif buyuruvchi ishqibozlar uchun "Paxtakor" futbol klubi ajoyib sovg‘alar tayyorlagan.
Uchrashuvdan avval stadionga tashrif buyuradigan ishqibozlar e’tiboriga konsert dasturi taqdim etilishi rejalashtirilgan. Shuningdek, tanaffus paytida yaqindagina Rossiyada o‘tkazilgan mehribonlik uylari o‘rtasidagi jahon chempionati g‘oliblarini taqdirlash marosimi o‘tkaziladi.
Muborak Ramazon oyida stadionga kelgan muxlislarga iftorlik uchun oziq-ovqatlar tarqatiladi. "Paxtakor" stadionida namoz o‘qib olishga sharoitlar yaratiladi.
Shuningdek, stadionlarga oilaviy tashrif buyuradigan muxlislar va jajji bolakaylar uchun bir qator qiziqarli attraksionlar, turli sovrinli o‘yinlar tashkil qilinadi.
Futbol muxlislarini 25 may kuni "Paxtakor" stadioniga chorlab qolamiz.
