Xabaringiz bor, O‘zbekiston futbol assosiasiyasi hamda O‘zbekiston Professional futbol ligasi tomonidan, yurtimizdagi muxlislik sohasini rag‘batlantirish maqsadida, Pepsi Superligadagi 12 qatnashchi jamoalarning eng faol ishqibozlariga Rossiyada o‘tadigan jahon chempionati o‘yinlariga kirish chiptalari tuhfa etilishi e’lon qilingan edi.

Bugun “Bunyodkor” muxlislar klubi rahbari Shovkat Imamov shunday chiptalarning biri sohibiga aylandi. “Bunyodkor” futbol klubi ofisida bo‘lib o‘tgan tadbirda “qaldirg‘ochlar”ning uzoq yillik sodiq ishqiboziga 28 iyun kungi Angliya – Belgiya bellashuvi chiptasini “Bunyodkor” FK moliya departamenti xodimasi Nilufar Achilova topshirdi.

- Avvalambor, O‘FA va O‘zPFLga chuqur minnatdorchilik bildirib qolaman. “Bunyodkor” ishqibozi ekanligimdan men g‘oyatda faxrlanaman. Barcha davralarda meni “Bunyodkor” muxlisi sifatida qattiq hurmat qilishadi. Sevimli jamoam bilan men Osiyo Chempionlar ligasi uchrashuvlari munosabati bilan qit’amizning mashhur stadionlarida bo‘lganman. Mana endi, jahon chempionatidek yirik musobaqani stadionda turib kuzatish nasib etayotganiga Yaratganga behisob shukurlar aytaman. Fursatdan foydalanib, barcha-barchani yaqinlashayotgan Ramazon hayiti bilan muborakbod etaman, - deydi chog‘ kayfiyatda 38 yoshli Shovkat Imamov.