Jahon chempionatining 1-turidan o‘rin olgan yana bir o‘yin yakuniga yetdi. Xorvatiya terma jamoasi Kaliningradda Nigeriyaga qarshi bahs olib borib, ishonchli g‘alabani qo‘lga kiritdi.

Tarkibdagi futbolchilarning mahorati borasida ustunlikka ega bo‘lgan yevropaliklar butun uchrashuv davomida barqaror o‘yin namoyish qilishdi. O‘yinning 32-daqiqasida hisob ochildi. Modrich o‘ng qanotdan yetkazgan uzatmani Manjukich bosh bilan darvoza tomon burishga harakat qildi. To‘p esa nigeriyalik himoyachi Eteboning oyog‘idan to‘rga borib tushdi.

Bahsning 70-daqiqasida afrikaliklar darvozasi tomon penalti belgilandi. Burchak to‘pi o‘yinga kiritilgan paytda Ekong ikki qo‘li bilan Mario Manjukichni qo‘li bilan ushlab yiqitdi. Belgilangan 11 metrli jarima zarbasini Luka Modrich aniq amalga oshirib, hisobni 2:0 ko‘rinishga keltirdi.

Bu bahsda xorvatlar yirik hisobda g‘alaba qozonishlari ham mumkin edi. Ikkinchi bo‘limga qo‘shib berilgan daqiqalarda Mateo Kovachich yakkama-yakka vaziyatda Nigeriya posbonini dog‘da qoldira olmadi.

Mazkur g‘alabadan keyin Xorvatiya terma jamoasi "D" guruhida peshqadam bo‘lib oldi.

JCH-2018. "D" guruhi, 1-tur
Xorvatiya – Nigeriya 2:0 (1:0, 1:0)
Gollar: 1:0 – 32, avtogol Etebo, 2:0 – 71, penalti Modrich.
Xorvatiya – Subashich, Vrsalko, Lovren, Vida, Strinich, Rakitich, Modrich, Perishich, Kramarich (Brozovich, 60), Rebich (Kovachich, 78), Mandjukich (Pyasa, 86).
Nigeriya – Uzoxo, Shexu, Trost-Ekong, Balogun, Idovu, Ndidi, Etebo, Ivobi (Musa, 62), Obi Mikel (Nvankvo, 88), Mozes, Igalo (Ixeanacho, 73).
Ogohlantirishlar: Rakitich (30), Trost-Ekong (70), Brozovich (89).