Yurtimizdagi maktabgacha ta’lim muassasasi tarbiyalanuvchilarining yozgi mavsum davomida bo‘sh vaqtlarini mazmunli tashkil etish, sportga bo‘lgan qiziqishlarini uyg‘otish, ommaviy sport turlariga jalb qilish, Vatanga mehr-sadoqat tuyg‘ularini shakllantirish, sog‘lom turmush tarzi talablari asosida tarbiyalash maqsadida “Yoshlarimiz – kelajagimiz” davlat dasturi doirasida “Sportga ilk qadam” loyihasini o‘tkazish bo‘yicha Respublika ixtisoslashtirilgan Olimpiya zaxiralari maktab internati va Chilonzor tumani maktabgacha ta’lim muassasa bo‘limi o‘zaro memorandum imzolashdi.

Mazkur loyiha doirasida maktabgacha ta’lim muassasalari tarbiyalanuvchilarining Respublika olimpiya zaxiralari kollejiga tashrifini tashkil etish, “Chaqqon bolajon” shiori ostida quvnoq startlar musobaqalari, “Yashil maydon yulduzchalari” futbol musobaqalarini joriy yil davomida bosqichma-bosqich, jadval asosida o‘tkazish rejalashtirilgan.

Shunday tadbirlardan biri bugun, 21 iyun kuni bo‘lib o‘tdi. Chilonzor tumanida joylashgan 429-maktabgacha ta’lim muassasasining jajji tarbiyalanuvchilari Respublika olimpiya zaxiralari kollejida bo‘lib, u yerdagi ot sportiga ixtisoslashtirilgan sport kompleksi bilan tanishishdi.

Shuningdek, bolajonlar kollej murabbiylaridan boks bo‘yicha ham master-klasslar olishdi. Hattoki, ular o‘rtasida kichik musobaqa ham tashkil qilindi. Sportning erkin va yunon-rum kurashlari turida esa bolajonlarga nafaqat kollej o‘quvchilari, balki O‘zbekiston milliy terma jamoasi a’zolari ham hamroh bo‘lishdi, ular bilan birgalikda sport kurashlari va boks bo‘yicha musobaqa tashkil qilishdi.

Bolajonlar nafaqat sport turlari bo‘yicha master-klasslar va musobaqalarda qatnashishdi, balki sport dargohi bilan atroflicha tanishish imkoniyatiga ham ega bo‘lishdi.