Юртимиздаги мактабгача таълим муассасаси тарбияланувчиларининг ёзги мавсум давомида бўш вақтларини мазмунли ташкил этиш, спортга бўлган қизиқишларини уйғотиш, оммавий спорт турларига жалб қилиш, Ватанга меҳр-садоқат туйғуларини шакллантириш, соғлом турмуш тарзи талаблари асосида тарбиялаш мақсадида “Ёшларимиз – келажагимиз” давлат дастури доирасида “Спортга илк қадам” лойиҳасини ўтказиш бўйича Республика ихтисослаштирилган Олимпия захиралари мактаб интернати ва Чилонзор тумани мактабгача таълим муассаса бўлими ўзаро меморандум имзолашди.
Мазкур лойиҳа доирасида мактабгача таълим муассасалари тарбияланувчиларининг Республика олимпия захиралари коллежига ташрифини ташкил этиш, “Чаққон болажон” шиори остида қувноқ стартлар мусобақалари, “Яшил майдон юлдузчалари” футбол мусобақаларини жорий йил давомида босқичма-босқич, жадвал асосида ўтказиш режалаштирилган.
Шундай тадбирлардан бири бугун, 21 июнь куни бўлиб ўтди. Чилонзор туманида жойлашган 429-мактабгача таълим муассасасининг жажжи тарбияланувчилари Республика олимпия захиралари коллежида бўлиб, у ердаги от спортига ихтисослаштирилган спорт комплекси билан танишишди.
Шунингдек, болажонлар коллеж мураббийларидан бокс бўйича ҳам мастер-класслар олишди. Ҳаттоки, улар ўртасида кичик мусобақа ҳам ташкил қилинди. Спортнинг эркин ва юнон-рум курашлари турида эса болажонларга нафақат коллеж ўқувчилари, балки Ўзбекистон миллий терма жамоаси аъзолари ҳам ҳамроҳ бўлишди, улар билан биргаликда спорт курашлари ва бокс бўйича мусобақа ташкил қилишди.
Болажонлар нафақат спорт турлари бўйича мастер-класслар ва мусобақаларда қатнашишди, балки спорт даргоҳи билан атрофлича танишиш имкониятига ҳам эга бўлишди.
