Bugun  O‘FA 1-vise-prezidenti Umid Ahmadjonov  Qashqadaryo viloyati futbol assosiyasidagi umumiy holatni o‘rganish va olimpiya sport turlarini rivojlantirish borasida amalga oshirilayotgan ishlar bilan yaqindan tanishish uchun Qarshi shahriga tashrif buyurgani haqida avval xabar berib o‘tgandik. 

Tashrif davomida Umid Ahmadjonov Qarshi shahridagi “Muruvvat” bolalar uyiga borib, u yerdagi bolakaylarning holidan xabar oldi. 

Ushbu bolalar uyida tarbiyalanayotgan bolajonlarning ko‘nglini ko‘tarish uchun ularga O‘zbekiston futbol assosiasiyasining sovg‘alari ulashildi. 

Ma’lumot uchun, ushbu bolalar uyida 4 yoshdan 18 yoshgacha bo‘lgan jami 280 nafar bola tarbiyalanmoqda. 

“Muruvvat”  bolalar uyini ko‘zdan kechirish jarayonida bu yerdagi mini-futbol maydoni ayanchli ahvolda ekani ma’lum bo‘ldi. Umid Ahmadjonov O‘FA hisobidan sovg‘a tariqasida “Muruvvat” bolalar uyidagi futbol maydonini zamonaviy talablarga mok keladigan tarzda to‘laligicha qayta rekonstruksiya qilish, sportni yanada ommalashtirish uchun sharoit yaratish bo‘yicha topshiriq berdi. Tez kunda bu yerdagi maydoncha yangi ko‘rinish kasb etadi. 

Shuningdek, bugun kun tartibidan Qarshidagi Olimpiya zaxiralari ixtisoslashtirilgan maktab internati hamda “Nasaf” klubi bilan yaqindan tanishish o‘rin olgan.   

Kun oxirida esa  viloyat hokimligining majlislar zalida Qashqadaryoda sport, xususan, futbol sohasini rivojlantirishda olib borilayotgan ishlar, yo‘l qo‘yilayotgan kamchiliklar bo‘yicha yig‘ilish o‘tkaziladi va tegishli xulosalar qilinadi.