«Barselona»ning o‘ng qanot himoyachisi Jyul Kundening jamoadan ketishi mumkinligi haqidagi mish-mishlar kuchayib bormoqda. «Ko‘k-anorranglilar» ustozi Xans-Diter Flik fransiyalik futbolchining jamoa uchun qay darajada muhimligiga shubha bilan qaray boshladi – himoyaning o‘ng qanotida boshqa futbolchilar ko‘proq maydonga tushmoqda.

Jurnalist Alfredo Martinesning xabar berishicha, avvalgi mavsumlardagi barqaror o‘yiniga qaramay, 27 yoshli futbolchi yozgi transferlar vaqtida sotilish bo‘yicha asosiy nomzodga aylanishi mumkin, chunki unga ingliz klublari tomonidan jiddiy qiziqish bildirilmoqda. Agar kataloniyaliklar Joau Kanseluni jamoada saqlab qolishga muvaffaq bo‘lsa, Kundening ketish ehtimoli yanada ortadi.

Transfermarkt portali ma’lumotlariga ko‘ra, Jyul Kundening transfer qiymati 65 million yevroni tashkil qiladi.