Belgiya terma jamoasi yarim himoyachisi Eden Azar Rossiyada o‘tayotgan jahon chempionatida finalgacha yetib borishni maqsad qilayotganini aytib o‘tdi.

«Krishtianu Ronaldu va Lionel Messi jahon chempionatini tark etishdi. Shu bois, o‘zimni ko‘rsatish uchun qulay payt yuzaga keldi. Men chorak final, yarim final, va balki finalgacha yetib borishni istayman. Albatta, o‘z oldiga shunday maqsad qo‘yayotgan faqat men emas. Messi va Ronaldu endi yo‘q, lekin musobaqada yaxshi futbolchilar ko‘p. Musobaqa so‘ngida nima yuzaga kelishini ko‘ramiz.

Hozirda ikki yoki to‘rt yil avvalgiga nisbatan ancha kuchliman. Tajribam ancha oshdi. To‘rt yil oldin Braziliyadagi jahon chempionati biz uchun ilk katta musobaqa bo‘lgandi. Pley-off bosqichida tajriba katta ahamiyatga ega. Jamoada yosh futbolchilar ko‘p bo‘lsa — og‘ir bo‘ladi. Hozir jamoamizdagi futbolchilar 25–30 yosh oralig‘ida. Barchamizning darajamiz bir xil. O‘ylaymanki, bu hal qiluvchi ahamiyatga ega bo‘ladi», — dedi Azar.