Superliganing 16-turida muxlislar “Paxtakor” va "Buxoro" o‘rtasidagi qarama-qarshilikka guvoh bo‘lishadi.
Oxirgi yillarda ushbu jamoalar to‘qnashuvi keskin kurashlar ostida kechmoqda. Chempionatlar doirasida klublar 51 bor to‘qnash kelishgan. "Sherlar" 35 bellashuvda zafar quchishgan, 7 o‘yinda "Buxoro" g‘olib chiqqan. 9 uchrashuvda jamoalar durang o‘ynashgan. “Paxtakor” 107 gol urib, darvozasidan 35 to‘p olib chiqqan. Ayni paytda jamoalar turnir jadvalida yuqori pog‘onalarni band etib turishibdi. Bu esa bellashuv ahamiyatini yanada oshiradi.
Toshkentdagi o‘yinlarning 22tasida “Sherlar” ustun kelishgan. 2 uchrashuvda durang va faqat bir bor mehmonlar g‘alabasi kuzatilgan. O‘zaro o‘yinlardagi eng yirik natija 2005 yil qayd etilgan. Buxoroda “Paxtakor” 8:0 hisobida g‘alaba qozongan.
Jamoamizdan bellashuvni sariq kartochkalar sababli Ismoil Gonsalvesh o‘tkazib yuboradi.
"Paxtakor" va "Buxoro" o‘rtasidagi 52-to‘qnashuv 8 iyul, yakshanba kuni "Paxtakor" stadionida soat 19:00da boshlanadi.
