Xorvatiya terma jamoasi himoyachisi Domagoy Vida Jahon chempionatining yarim final bosqichida bo‘ladigan Angliyaga qarshi o‘yindan diskvalifikasiya qilinishi mumkin.

Rossiyaga qarshi bo‘lib o‘tgan chorak final bahsidan keyin Vida va Kiyevning "Dinamo" klubi menejeri lavozimida ishlayotgan Ognen Vukoyevich o‘zlarini videotasvirga tushirib, "Ukrainaga shon-sharaflar bo‘lsin!", "Bu g‘alaba "Dinamo" va Ukraina uchun" — deya xursandchilik qilishdi. Bu videolavhani ular ijtimoiy tarmoqlarga joylashdi. Har ikkala futbolchi uzoq vaqt davomida "Dinamo" (Kiyev) sharafini himoya qilgan.

"FIFA Rossiya-Xorvatiya bahsi bilan bog‘liq turli hisobotlarni yig‘moqda, jumladan, mazkur masala borasida ham. Tushuning, hozircha barcha ma’lumotlarni qo‘lga kiritmagan ekanmiz, bu borada izoh bera olmaymiz", — deya FIFAning javobidan iqtibos keltirdi The Sun nashri.

Domagoy Vidaning o‘zi esa bu videolavha siyosat emas, shunchaki Kiyevdagi do‘stlariga yo‘llangan salom ekanini ta’kidlab o‘tdi.