Хорватия терма жамоаси ҳимоячиси Домагой Вида Жаҳон чемпионатининг ярим финал босқичида бўладиган Англияга қарши ўйиндан дисквалификация қилиниши мумкин.

Россияга қарши бўлиб ўтган чорак финал баҳсидан кейин Вида ва Киевнинг "Динамо" клуби менежери лавозимида ишлаётган Огнен Вукоевич ўзларини видеотасвирга тушириб, "Украинага шон-шарафлар бўлсин!", "Бу ғалаба "Динамо" ва Украина учун" — дея хурсандчилик қилишди. Бу видеолавҳани улар ижтимоий тармоқларга жойлашди. Ҳар иккала футболчи узоқ вақт давомида "Динамо" (Киев) шарафини ҳимоя қилган.

"ФИФА Россия-Хорватия баҳси билан боғлиқ турли ҳисоботларни йиғмоқда, жумладан, мазкур масала борасида ҳам. Тушунинг, ҳозирча барча маълумотларни қўлга киритмаган эканмиз, бу борада изоҳ бера олмаймиз", — дея ФИФАнинг жавобидан иқтибос келтирди The Sun нашри.

Домагой Виданинг ўзи эса бу видеолавҳа сиёсат эмас, шунчаки Киевдаги дўстларига йўлланган салом эканини таъкидлаб ўтди.