Toshkent shahrida yoshlar o‘rtasida og‘ir atletika bo‘yicha jahon chempionati o‘zining qizg‘in pallasiga kirgan.

Bugun musobaqada qizlar o‘rtasida -75kg, yigitlar o‘rtasida esa -94kg vazn toifasidagi polvonlar o‘z omadlarini sinab ko‘rishadi. Bellashuvlarda uch nafar hamyurtimiz yurtimiz sharafini himoya qiladi. Yigitlar o‘rtasidagi bahslarda Azimjon Ahmedov «B» guruhida supachaga chiqsa, qizlarimizdan Tursunoy Jabborova va Gulnoza Ahmadova «A» guruhida sovrinli o‘rinlar uchun kurash olib borishadi.

Eslatib o‘tamiz, musobaqa davomida yigitlar o‘rtasida -62 kg vazn toifasida Adhamjon Ergashev har uchchala yo‘nalishda (dast ko‘tarish, siltab ko‘tarish va umumiy natija) oltin medalga sazovor bo‘lib, yoshlar o‘rtasida jahon chempionligiga erishgandi. Qizlar o‘rtasidagi bahslarda Kumushxon Fayzullayeva bronza (dast ko‘tarish) va ikkita oltin (siltab ko‘tarish va ikkikurash) medalni qo‘lga kiritdi. Shuningdek, -77kg vazn toifasida G‘ayrat Aytmuratov dast ko‘tarish bo‘yicha bronza medalini terma jamoamiz hisobiga qo‘shib qo‘ydi.