Тошкент шаҳрида ёшлар ўртасида оғир атлетика бўйича жаҳон чемпионати ўзининг қизғин палласига кирган.
Бугун мусобақада қизлар ўртасида -75кг, йигитлар ўртасида эса -94кг вазн тоифасидаги полвонлар ўз омадларини синаб кўришади. Беллашувларда уч нафар ҳамюртимиз юртимиз шарафини ҳимоя қилади. Йигитлар ўртасидаги баҳсларда Азимжон Аҳмедов «B» гуруҳида супачага чиқса, қизларимиздан Турсуной Жабборова ва Гулноза Аҳмадова «А» гуруҳида совринли ўринлар учун кураш олиб боришади.
Эслатиб ўтамиз, мусобақа давомида йигитлар ўртасида -62 кг вазн тоифасида Адҳамжон Эргашев ҳар уччала йўналишда (даст кўтариш, силтаб кўтариш ва умумий натижа) олтин медалга сазовор бўлиб, ёшлар ўртасида жаҳон чемпионлигига эришганди. Қизлар ўртасидаги баҳсларда Кумушхон Файзуллаева бронза (даст кўтариш) ва иккита олтин (силтаб кўтариш ва иккикураш) медални қўлга киритди. Шунингдек, -77кг вазн тоифасида Ғайрат Айтмуратов даст кўтариш бўйича бронза медалини терма жамоамиз ҳисобига қўшиб қўйди.
