"Манчестер Юнайтед"нинг собиқ ҳужумчиси Тедди Шерингем Криштиану Роналду профессионал футболчилик фаолиятини якунлаганидан кейин мураббийлик соҳасига ўтиш эҳтимоли ҳақида фикр билдирди.
Англиялик собиқ футболчининг ҳисоблашича, Роналдунинг келажакда мураббий сифатида иш бошлаши эҳтимоли юқори эмас. Бироқ уни қизиқтириши мумкин бўлган битта вариант мавжуд.
"Мен Роналдуни ҳафтасига етти кун, кунига 24 соат ишлайдиган мураббий сифатида тасаввур қила олмайман.
Назаримда, уни мураббийликка қизиқтириши мумкин бўлган ягона вариант — Португалия миллий терма жамоасини бошқариш", — дея Шерингемнинг сўзларини келтиради The Touchline нашри.
Айни пайтда 41 ёшли Криштиану Роналду Саудия Арабистонининг "Ан-Наср" клубида тўп сурмоқда. Португалиялик юлдуз 2023 йилдан буён мазкур жамоа шарафини ҳимоя қилиб келмоқда.
Тажрибали ҳужумчи жорий мавсумда барча мусобақалар доирасида 9 та учрашувда иштирок этиб, 5 та гол уришга муваффақ бўлган.
Роналдунинг "Ан-Наср" билан амалдаги шартномаси 2027 йилнинг ёзига қадар мўлжалланган.
Ҳозирча португалиялик футболчи фаолиятини якунлагач, мураббийлик билан шуғулланиш нияти борлиги ҳақида расмий баёнот бермаган.
