«Барселона» президенти Жоан Лапорта Мадриднинг «Реал» клуби олиб бораётган сиёсатни кескин танқид қилиб, Килиан Мбаппенинг 2024 йилдаги трансфери борасида ўз фикрини билдирди.
Каталония клуби раҳбари L’Equipe нашрига берган интервьюсида мадридликларнинг жамоавий манфаатлардан кўра, юлдуз футболчиларга кўпроқ эътибор қаратишини танқид қилди.
«Бир катакда иккита хўроз бўлиши мумкин эмас. Бу ҳеч қачон иш бермайди. Футболда энг муҳим нарса — жамоа.
“Реал” эса доимо катта номга эга футболчиларни афзал кўриб келган. Менимча, шу сабабли улар бутунлай ишончни йўқотишди.
Айнан шунинг учун Флорентино Перес Негрейра иши ҳақида ёлғон маълумотлар тарқатиб, ўзини оқлашга уринмоқда.
Натижа эса битта — “Реал” икки йилдан буён ҳеч қандай соврин ютмаяпти!» — деди Лапорта.
Айни пайтда «Барселона» Испания чемпионатида 8 та учрашувдан сўнг 24 очко билан турнир жадвалида пешқадамлик қилмоқда. «Реал» эса 21 очко билан учинчи ўринда бормоқда.
Эслатиб ўтамиз, Ла Лиганинг 10-турида «Барселона» ўз майдонида «Реал»ни қабул қилади. «Эл-класико» 25 октябрь куни Москва вақти билан соат 23:00 да, Тошкент вақти билан эса 26 октябрга ўтар кечаси соат 01:00 да бошланади.
