«Интер Майами»нинг юлдуз ҳужумчиси, узоқ йиллар «Барселона» шарафини ҳимоя қилган Лионель Месси каталонияликларга бир футболчини сотиб олишни тавсия қилди.

Журналист Экрем Конурнинг ижтимоий тармоқларда хабар беришича, аргентиналик футболчи Испания чемпионига 18 ёшли мексикалик вингер Хильберто Морани ўз сафига қўшиб олишни маслаҳат берган.

Қайд этилишича, «Барселона» ушбу футболчи учун курашда «Арсенал», «Реал Мадрид» ва «Ливерпуль» билан рақобатлашишига тўғри келади.

Мора айни пайтда ўз ватанида, Мексиканинг «Тихуана» клубида тўп сурмоқда.

Футболчининг клуб билан амалдаги шартномаси 2029 йилнинг июнь ойи охиригача мўлжалланган.

Transfermarkt портали Хильберто Моранинг бозор қийматини 25 миллион еврога баҳоламоқда.