To‘p uzoq parvoz qildi. Fransiya terma jamoasining chap qanot himoyachisi Lyuka Ernandesning uzatmasiga «labbay» deb javob bergan Benjamen Pavar darvozani aniq nishonga oldi.
To‘p katta tezlikda uchdi. Lekin darvoza ancha olisda edi.
O‘z klubida Pavar bunday zarbani amalga oshira olmasdi. Chunki «Shtutgart»da u markaziy himoyachi pozisiyasida o‘ynaydi. Shu bois, oldingi chiziqqa faqat standart vaziyatlarda yo‘l olishi mumkin. Didye Desham esa jamoa uchun muammo bo‘lib turgan o‘ng qanot mudofaasini aynan shu universal bilan kuchaytirishga qaror qildi.
Benjamenni Lilian Tyuramga qiyoslash mumkin. Bu buyuk afsona ham klubida himoya markazida, termada esa qanotda faoliyat yuritgan. Yagona farq shundaki, Tyuram - taniqli futbolchi, Pavarni esa shu paytgacha ko‘pchilik tanimasdi.
Ta’kidlash joizki, «Lill» tarkibidan joy ololmagan paytda Benjamen ko‘pchilik uchun ajablanarli yo‘lni tanladi - Fransiyaning o‘rtamiyonalari takliflarini rad etib, notanish xorij klubiga yo‘l oldi. Uning otasi - Frederik Benjamenning 9 yoshidan boshlab birorta uchrashuvini o‘tkazib yuborgan emas, barcha masalalarda farzandiga yordam beradi.
O‘g‘lining «Shtutgart»ga o‘tishi ikki narsani anglatadi: Frederik o‘g‘lining mustaqilligini ma’qullagan, Ben esa bir qadam ortga qaytishni to‘g‘ri qaror deb bilgan. Pavarning o‘z salohiyatiga xolis baho berishi samara keltirdi.
Elitaga ko‘tarilish mavsumida «Shtutgart»ni yoshlarga ishonch bildirishga moyil bo‘lgan Xannes Volf boshqarardi. Bendagi universallikni aynan u kashf etdi. Pavar himoya chizig‘ining barcha nuqtalarida ishonchli o‘ynadi.
Volf «Shtutgart»ni tark etganida, fransiyalik shogirdi birinchilardan bo‘lib unga minnatdorchilik bildirdi: «Sizning qimmatli maslahatlaringiz va sabr-qanoatingiz tufayli men kunsayin samaraliroq o‘ynaydigan bo‘ldim. Sizdan bir umrga minnatdorman!».
Darhaqiqat, bir yil ichida himoyachining saviyasi hayratlanarli darajada o‘sdi. Vatani sharafini himoya qilishni Ben doimo o‘zgacha sharaf o‘rnida ko‘rgan - o‘smirlik chog‘larida «Marselyeza»ning ulug‘vor sadosini titroqsiz tinglay olmasdi.
Milliy jamoada ham o‘sha jo‘shqin ehtiros va hayajon uni tark etgani yo‘q...
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
