18 iyun – 15 iyul sanalari oralig‘ida O‘zbekistonda yozgi transferlar oynasi ochiq bo‘ldi va klublar o‘z tarkiblarini yangi ijrochilar bilan to‘ldirib olish imkoniyatiga ega bo‘lishdi. O‘zbekiston Professional Futbol Ligasi 16 iyul soat 00:00dan so‘ng yangi futbolchilarni ro‘yxatdan o‘tkazish jarayonini yakunladi.
Amalga oshirilgan transferlar sarhisob qilinganida O‘zbekiston Superligasi ishtirokchi klublari yozgi transferlar vaqtida 97 nafar yangi o‘yinchilar bilan shartnoma imzolagani ma’lum bo‘ldi. O‘z navbatida klublarni roppa-rosa 99 nafar o‘yinchi tark etdi.
Eng ko‘p yangi o‘yinchi olgan va eskilari bilan xayrlashgan jamoa – Farg‘onaning «Neftchi» klubi bo‘ldi. Farg‘onaliklar safini 16 nafar futbolchi tark etdi. Shuningdek, «Neftchi» tarkibiga 14 nafar o‘yinchi kelib qo‘shildi.
