Bundan 20 yil muqaddam Didye Desham o‘z tarixida ilk bora jahon futbolining tojdoriga aylangan Fransiya terma jamoasining sardori edi.
Endi u «uchranglilar»ni bosh murabbiy sifatida taxtga olib chiqdi! Albatta, mo‘’jizakor saltanat atoqli afsonalarga juda boy. Ana shu yulduzlar gulshanida Deshamning o‘ziga yarasha o‘rni, nufuzi bor.
REGBI O‘RNIGA FUTBOL
Fransuz futbolining oltin davrida saralar sardori bo‘lgan Didye mamlakatning janubi-g‘arbida joylashgan mo‘’jazgina, lekin o‘ta xushmanzara sayyohlik shaharchasi - Bayonnada tavallud topdi. Adur va Niv daryolarining qo‘shilish nuqtasida joylashgan shaharcha Ispaniyaga chegaradosh.
Bayonna Bask sohillarining poytaxti bo‘lib, Fransiyadagi basklar madaniy markazi hisoblanadi. Shu bois, yoz oylarida bu hudud korrida musobaqalari bilan gavjum bo‘ladi. Desham ana shu elat oilasida dunyoga keldi.
«O‘z elim, avlodlarim bilan faxrlanaman. Shu o‘lkada o‘sib-ulg‘aydim. Hozir men uchun eng qiyin savol kim ekanimni aytish - fransuzmanmi yoki bask? Muhimi, 3ta qadriyatga qat’iy amal qiladigan oilada tug‘ilish baxtiga muyassar bo‘ldim: kamtarlik, halollik va mehnatsevarlik», - deydi Desham.
Didyedagi mehnatsevarlik bolaligidayoq bo‘y ko‘rsata boshladi - u otasi bilan regbi mashg‘ulotlariga yo‘l oldi. Sababi oddiy: katta Desham aynan shu sport turiga ko‘ngil bergan, lekin yuksak natijalarga erisha olmagandi. Tabiiyki, o‘z orzusiga o‘g‘li orqali erishishga intildi.
Biroq bu reja ham amalga oshmadi - «Biarris Olimpik» klubini Didye tez orada tark etdi: «Men bilan shug‘ullanayotgan bolalar jismonan juda baquvvat edilar. Men esa bu borada maqtana olmasdim».
«Qovun»dan dumaloq to‘pni afzal ko‘rgan kichik Desham ilk mashg‘ulotdayoq yetakchilik layoqati bilan tengdoshlaridan ajralib turardi. Shunga qaramasdan, avvaliga kamtarin «Bayonna» maktabida saboq oldi.
Faqat 14 yoshga chiqqanida «Nant» skautlari e’tiboriga tushdi. Shu tariqa uning professional faoliyati boshlandi. Ha, aytgancha, regbini ham butunlay unutgani yo‘q - vaqti-vaqti bilan Zidan, Lizarazyu, Bartez kabi do‘stlari hamrohligida shug‘ullanib turadi.
G‘OLIBLIK RUHIYATI
Shunday sportchilar borki, sovrinlar ularni quvib yuradi. «Tabiatan chinakam chempionlar» toifasidan bo‘lgan bu iqtidorlar kelgan jamoa albatta zafar quchadi.
Desham - ularning biri. 1989 yilda u «Marsel»ga o‘tganida, jamoa 2 marta chempionlikka erishdi. 1992-1993 yillar mavsumida esa YECHLdagi tarixiy g‘alabasini nishonladi. Undan avval ham, keyin ham hech qaysi fransuz klubi bunday natijaga erisha olmagan!
«Yuventus» bilan Didye 3 marta «A» seriyasida, Italiya kubogi va Superkubogida g‘olib chiqdi, YECHL bosh sovrini, Qit’alararo kubok va UYEFA Superkubogini qo‘lga kiritdi.
Faoliyatining so‘nggi bosqichida «Chelsi»ga Angliya kubogini hadya etdi. Oxirgi mavsumini «Valensiya»da o‘tkazib, chinakam mo‘’jiza ko‘rsatdi - kamtarin jamoa YECHL finalida penaltilar seriyasiga ko‘ra «Bavariya»dan yengildi!
Shubhasiz, o‘zining buyuk zafarlarini Desham Fransiya termasida nishonladi. Jamoa 1998 yilda jahon, ikki yildan keyin esa qit’a cho‘qqilarini zabt etdi. Didye ana shu oltin tarkibni saralar sardori sifatida maydonga olib tushdi.
E’tiborli jihati shundaki, Deshamdagi ishning ko‘zini bilish qobiliyati murabbiylik sohasida ham uni tark etmadi. U boshqargan «Monako» Fransiya kubogini qo‘lga kiritib, YECHLda finalgacha yetib bordi.
«Yuventus» «V» seriyasida g‘olib chiqdi, «Marsel» esa nafaqat chempionlik, balki ikkita kubokka ham sazovor bo‘ldi. Nihoyat, ishbilarmon murabbiy mamlakatning bosh jamoasini shohsupa sari yetakladi.
OLTIN JAMOANING «MESHKOB»-SARDORI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
