Xabaringiz bor, Osiyo o‘yinlari ilk marotaba ikki shaharda o‘tkazilmoqda. Qit’ada to‘rt yillikning eng nufuzli musobaqasiga bu safar Jakarta va Palembang shaharlari mezbonlik qilmoqda.
Asosiy bahslar poytaxt Jakarta shahrida bo‘lib o‘tayotgan bo‘lsada, Palembangda ham bir necha sport turlari buyicha musobaqalar tashkil etilgan.
Jumladan, Sumatra orolining yirik shaharlaridan birida akademik eshkak eshish va tennis bo‘yicha o‘tkazilgan bahslar hamyurtlarimiz uchun omadli keldi. Zero aynan ushbu bellashuvlarda o‘zbekistonlik sportchilar oltin medallarni qo‘lga kiritishdi.
Bugun, 28 avgust kuni Milliy olimpiya qo‘mitasi Bosh kotibi Jasur Matchanov Palembang shahriga tashrif buyurdi. U yerda o‘zbek sportchilari bilan uchrashdi, yaratilgan sharoitlar bilan yaqindan tanishdi. Delegasiyamiz a’zolari bilan suhbatlashdi.
Uchrashuv davomida Osiyo o‘yinlarida sovrindor bo‘lgan hamyurtlarimizga an’anaga ko‘ra MOQ nomidan esdalik sovg‘alarini taqdim etdi.
Eslatib o‘tamiz, Osiyo o‘yinlari doirasida Palembang shahrida o‘zbekistonlik sportchilar akademik eshkak eshish, baydarka va kanoeda eshkak eshish, tennis, o‘q otish, triatlon kabi bahslarda ishtirok etmoqdalar.
