Хабарингиз бор, Осиё ўйинлари илк маротаба икки шаҳарда ўтказилмоқда. Қитъада тўрт йилликнинг энг нуфузли мусобақасига бу сафар Жакарта ва Палембанг шаҳарлари мезбонлик қилмоқда.
Асосий баҳслар пойтахт Жакарта шаҳрида бўлиб ўтаётган бўлсада, Палембангда ҳам бир неча спорт турлари буйича мусобақалар ташкил этилган.
Жумладан, Суматра оролининг йирик шаҳарларидан бирида академик эшкак эшиш ва теннис бўйича ўтказилган баҳслар ҳамюртларимиз учун омадли келди. Зеро айнан ушбу беллашувларда ўзбекистонлик спортчилар олтин медалларни қўлга киритишди.
Бугун, 28 август куни Миллий олимпия қўмитаси Бош котиби Жасур Матчанов Палембанг шаҳрига ташриф буюрди. У ерда ўзбек спортчилари билан учрашди, яратилган шароитлар билан яқиндан танишди. Делегациямиз аъзолари билан суҳбатлашди.
Учрашув давомида Осиё ўйинларида совриндор бўлган ҳамюртларимизга анъанага кўра МОҚ номидан эсдалик совғаларини тақдим этди.
Эслатиб ўтамиз, Осиё ўйинлари доирасида Палембанг шаҳрида ўзбекистонлик спортчилар академик эшкак эшиш, байдарка ва каноэда эшкак эшиш, теннис, ўқ отиш, триатлон каби баҳсларда иштирок этмоқдалар.
