Millionlar o‘yinida futbolchilarning o‘yin uslubi, tashqi ko‘rinishi, jussasi va qiliqlariga qarab ularga o‘ziga xos nomlar qo‘yish urf bo‘lgan.
Soccer.ru xuddi shunday original laqabga ega o‘yinchilarni saralab, ularni muxlislar e’tiboriga havola etdi.
Karsten «Bolg‘a» Yanker. Mabodo germaniyalik ushbu futbolchining o‘yinlarini ko‘rgan bo‘lsangiz, sizda savol tug‘ilishi aniq: «Nima uchun unga «Bolg‘a» deb laqab qo‘yilgan?». Yaqinda 44 yoshni qarshilagan Karstenning tashqi ko‘rinishi savolga javob berishi mumkin. Bo‘yi 194 santimetr, taqirbosh, bahaybat, devkelbat Yankerga qo‘yilgan nom o‘zini oqlaydi.
Luis «Fenomen» Ronaldo. Katta ehtimol bilan, so‘nggi yigirma yillikning eng yaxshi markaziy hujumchisi. Ronaldo namoyish etgan futbolni ko‘rsangiz, «Fenomen» so‘zi o‘z-o‘zidan miyangizda charx urishi turgan gap.
Ole-Gunnar «Go‘daksiymo qotil» Sulsher. U hozir ham shunday ko‘rinadi. Ayni payt Sulsher Norvegiyaning «Molde» klubida bosh murabbiy sifatida faoliyat yuritmoqda.
Alessandro «Pinturikkyo» Del Pyero. Italiyalik rassomning nomi berilishiga o‘ziga xos sabab bor. Xuddi Pinturikkyo singari Alessandroning yashil maydonda ko‘rsatgan shedevrlari asrlarga tatiydi. Bundan tashqari, Del Pyeroni «Mister «Yuventus» deb ham atashadi. Mazkur holatda, izohga hojat yo‘q.
Bastian «Cho‘chqa» Shvaynshtayger. Bu yerda ham hammasi oddiy. Bastianning familiyasi so‘zma-so‘z tarjima qilinganda «cho‘chqaxona» ma’nosini beradi. Ya’ni «shvayn» - cho‘chqa degani.
Toni «Golster» Polster. Avstriyalik hujumchi ko‘p gol urgani uchun uning familiyasidagi bitta harfni o‘zgartirib, «Golster» deb laqab qo‘yishgan.
Ivan «Vertolyot» Samorano. Bugungi ro‘yxat chililik forvardsiz to‘liq bo‘lmasdi, chunki Samoranoning taxalluslari juda ko‘p. «Vertolyot» laqabini esa u Yevropada orttirgan - sersoch yigit raqib jarima maydonchasida xuddi parrak singari harakatlanardi. Shuningdek, ruslar Samoranoni «Ivan Grozniy» deb atashgan. Janubiy Amerikada esa Ivanga «Bam-Bam» laqabi qo‘yilgan.
Rinat «Temir parda» Dasayev. Rinat Fayzrahmanovichning taxallusini uning «Sevilya»dagi sheriklari o‘ylab topishgan.
Lilian «Faylasuf» Tyuram. Jahon va Yevropa chempionining muvaffaqiyati faqatgina futbolga taalluqli emas. Tyuram bir nechta ilmiy unvonga ega, jumladan falsafa fanlari bo‘yicha ham.
Patrik «Sakkizoyoq» Viyeyra. Ha, bu futbolchining asosiy ustunligi - uzun oyoqlari maydon markazida hukm-ronlik qilish imkonini bergan.
Andrea «Arxitektor» Pirlo. Italiyalik yarim himoyachi murakkab uzatmalar loyihasini tuzgan, turli kombinasiyalar o‘ylab topgan. O‘zi to‘p surgan jamoalarning haqiqiy «Arxitektori» bo‘lgan.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
