Pro-Liga 27-turi doirasidagi markaziy o‘yinlaridan biri Samarqandda kechadi. Azaliy raqib sanalmish “Dinamo” va “Andijon” jamoalari o‘zaro maydonga tushishadi.
BIR XIL MAQSAD, IKKI XIL VAZIYAT...
Superligani maqsad qilgan ushbu ikki klub ayni damda ikki xil vaziyatda. Pro-Liga “A” guruhida “Dinamo” 33 ochko bilan 5-o‘rinda ketayotgan bo‘lsa, 10 ochko ko‘p jamg‘argan “Andijon” 43 ochko bilan 1-pog‘onadan joy olgan.
Samarqanddagi o‘yindagi g‘alaba “Dinamo” uchun Superliga yo‘llanmasi uchun kurashish imkoniyatini oshirsa, “Andijon” 3 ochkoni qo‘lga kiritmagan taqdirda peshqadamlikni qo‘ldan boy berishi mumkin.
Nabvatdagi turda ham 5 oktyabr kuni ushbu jamoalar 4-davraning dastlabki uchrashuvida Andijonda o‘zaro bellashishadi.
AZIMOV VA OTAXONOV O‘YNAMAYDI
“Dinamo” – “Andijon” uchrashuvi oldidan har ikki jamoa tarkibida bittadan yo‘qotish mavjud. Samarqandliklar safida Jasur Azimov sariq kartochkalari soni 4 taga yetgani bois yordam bera olmasa, andijonliklar safida Ibrohim Otaxonov xuddi shu sabab jamoasiga yordam bera olmaydi.
KIM QANDAY HOLATDA?
«Dinamo» 3-davrani ancha yuqori sur’atda o‘tkazayotib, o‘tkazgan so‘nggi 7 ta uchrashuvida 16 ochko jamg‘argan bo‘lsa, “Andijon” so‘nggi 7 ta o‘yinda 11 ochko jamg‘ardi. Jamoalarning so‘nggi 5 ta turdagi natijalari:
«Dinamo»ning so‘nggi 6 ta o‘yini:
Dinamo – Mash’al – 2:0
Istiqlol – Dinamo – 0:1
Dinamo – Xorazm – 2:1
Surxon – Dinamo – 1:1
Dinamo – Sho‘rtan – 1:2
Orol – Dinamo – 0:2
«Andijon»ning so‘nggi 6 ta o‘yini:
Istiqlol – Andijon – 1:0
Andijon – Xorazm – 6:1
Surxon – Andijon – 0:3
Andijon – Sho‘rtan – 0:1
Orol – Andijon – 1:1
Andijon – Nori – 0:0
O‘ZARO O‘YINLAR: USTUNLIK «DINAMO»DA
Statistikaga nazar tashlar ekanmiz, “Dinamo” va “Andijon” chempionat doirasida 42 marta o‘zaro to‘qnash kelishgan. Ushbu o‘yinlardan 18 tasida “Dinamo” “Andijon”ni mag‘lub eta olgan. 15 o‘yinda esa andijonliklar g‘olib bo‘lishgan. 9 ta o‘yinda esa tomonlar murosa ko‘chasini tanlashgan.
Jamoalarning dastlabki davradagi o‘yinida 1:1 hisobi qayd etilgan bo‘lsa, Andijondagi o‘yinda 3:1 hisobida mezbonlar zafar quchishgan.
OCHKOLAR…
“Dinamo” shu kungacha o‘zaro o‘yinlarda “Andijon” darvozasiga 64 ta gol kiritgan. “Andijon”ning gollari esa 55 ta. “Burgutlar” o‘zaro o‘yinlarda 54 ochko ishlab olishgan bo‘lsa, “Dinamo” esa 63 ochkoni qo‘lga kirita olgan.
ENG YIRIK HISOB…
«Dinamo» 1993 yildan buyon Samarqandda «Andijon»ga mag‘lub bo‘lmagan. “Dinamo”ning “Andijon” ustidan erishgan eng yirik g‘alabasi 6:1ni tashkil qiladi. O‘shanda samarqandliklar safida Hamdam Rahmonov zaxiradan maydonga tushib, 5 ta gol muallifiga aylangan. Bu chempionatdagi rekord natijadir. “Andijon”ning “Dinamo” ustidan qozongan eng yirik hisobdagi g‘alabasi esa – 4:1ga teng.
Samarqandda o‘tgan so‘nggi 6 uchrashuv:
14.05.2018 «Dinamo» - «Andijon» 1:1
26.06.2015 «Dinamo» - «Andijon» 2:1
27.08.2014 «Dinamo» - «Andijon» 2:0
19.10.2012 «Dinamo» - «Andijon» 3:0
21.05.2011 «Dinamo» - «Andijon» 3:1
27.05.2010 «Dinamo» - «Andijon» 2:0
BILASIZMI...
“Dinamo” Samarqandda o‘tgan o‘zaro 20 ta o‘yinning 13 tasida g‘alaba qozongan. 6 ta uchrashuvda durang qayd etilgan.
“Andijon” o‘z tarixida bir marotiba - 1993 yilda Samrqanddan g‘alaba bilan qaytgan. Shundan keyin bo‘lib o‘tgan 19 o‘yinda “Dinamo” o‘z maydonida bu raqibga umuman mag‘lub bo‘lmagan.
O‘YINNI KIM BOSHQARADI?
Ushbu uchrashuvni boshqarib borish tajribali hakamlardan biri Vladislav Seytlinga ishonib topshirilgan.
Pro-Liga. “A” guruhi.
27-tur. 30 sentyabr (yakshanba)
“Dinamo” – “Andijon”
Bosh hakam: Vladislav Seytlin
O‘yin boshlanish vaqti: 17:00.
«Dinamo» klubi Matbuot xizmati.
