Bundan bir necha kun oldin Gruziyaning Batumi shahrida 43-Butunjahon shaxmat Olimpiadasi nihoyasiga yetgan va ushbu nufuzli musobaqada o‘zbekistonlik aql-idrok sohiblari ham ishtirok etishgandi. 150 mamlakat vakillari qatnashgan shaxmat Olimpiadasi yakunlariga ko‘ra, erkaklar va ayollar terma jamoalarimiz kuchli yigirmatalikka kirishga muvaffaq bo‘lgandilar.

Shu munosabat bilan bugun, 10 oktyabr kuni O‘zbekiston shaxmat federasiyasida mazkur Olimpiadada ishtirok etgan sportchilarimiz ishtirokida maxsus tadbir tashkil etildi. Tadbir davomida O‘zbekiston shaxmat federasiyasi mutasaddilari ishtirokida matbuot anjumani ham bo‘lib o‘tdi. Anjumanda qatnashgan ommaviy axborot vositalari xodimlari o‘zlarini qiziqtirgan bir qator savollarga javob oldilar. Shuningdek, shaxmat Olimpiadasi ishtirokchilari bilan suhbatlashdilar.

«43-Butunjahon shaxmat Olimpiadasida muvaffaqiyatli ishtirok etdik. O‘z guruhimizda birinchi bo‘ldik. Bundan juda xursandmiz. Hali O‘zbekiston tarixida bunday natija bo‘lmagandi. Ushbu musobaqada beshinchi marotaba ishtirok etdim. Qizlar bilan birgalikda O‘zbekiston sharafini munosib himoya qildik deb o‘ylayman. Musobaqa davomida Rossiya, Indoneziya, Fransiya, Ruminiya kabi terma jamoalarga qarshi o‘yin o‘tkazdik. Bahslar davomida rossiyalik raqibim ustidan qozongan g‘alabam chiroyli bo‘ldi», – dedi shaxmat Olimpiadasida ishtirok etgan sportchimiz Nodira Nodirjonova.

So‘ngra 13 yoshida xalqaro grossmeysterga aylangan Nodirbek Abdusattorov ishtirokida shaxmat seansi tashkil etildi. Unda jahonda eng yosh grossmeyster bo‘lish bo‘yicha ikkinchi ko‘rsatkichni qayd etgan Nodirbek shaxmat muxlislari bilan uchrashuv o‘tkazdi.

«Gruziyaning Batumi shahrida bo‘lib o‘tgan Olimpiadada umumjamoa hisobida 16-o‘rinni egalladik. O‘ylaymanki, bu yaxshi natija. Bundan keyingi Olimpiadalarda ham bundan yaxshiroq natija ko‘rsatib, sovrinli o‘rinlar uchun kurashamiz. Musobaqada har bir mamlakat o‘zining eng kuchli shaxmatchilari bilan ishtirok etdi. Ukrainalik shaxmatchilarga qarshi uchrashuvlar qiyin bo‘ldi. Chunki, ular jahonning eng kuchli terma jamoalaridan biri hisoblanadilar», – dedi Nodirbek Abdusattorov.