Xabar berib o‘tganimizdek, Argentinadagi o‘smirlar Olimpiya o‘yinlarida ishtirok etayotgan dzyudochimiz Jayhunbek Nazarov mikst bahslarida oltin medalni qo‘lga kiritdi. Hamyurtimiz «Beijing» jamoasi safida boshqa mamlakat vakillari bilan birgalikda shohsupaning eng yuqori pog‘onasidan joy oldi. Jayhunbek hal qiluvchi bahsda ispaniyalik raqibini mag‘lubiyatga uchratdi. Bungacha u yakkalik bahslarida aynan unga chorak finalda mag‘lub bo‘lgandi. Bu safargi jangda esa sportchimiz revansh olishni uddasidan chiqdi. Ushbu muvaffaqiyatdan so‘ng hamyurtimiz o‘z fikrlari bilan o‘rtoqlashdi.

«Jamoamiz bahslarni ishonch bilan o‘tkazdi va biz yakunda oltin medal qo‘lga kirita oldik. O‘zim finalda ispaniyalik raqibimni mag‘lub eta oldim. Yakkalik bahslarida unga imkoniyatni boy berib qo‘ygandim. Bu safar omad men tomonda bo‘ldi. Alamli mag‘lubiyatdan so‘ng men jangga yana tayyorlana oldim va uni mag‘lub etdim. O‘smirlar Olimpiya o‘yinlari shohsupasida g‘olib sifatida turish – bu so‘z bilan tasvirlab berib bo‘lmaydigan hislardir. Qo‘llab-quvvatlaganingiz uchun barchaga rahmat», – dedi sportchi.