Ispaniya terma jamoasi yarim himoyachisi Rodrining «Manchester Siti»dan «Barselona»ga o‘tishi kataloniyaliklarga umumiy hisobda 210 million yevroga tushishi mumkin. AS nashrining xabar berishicha, kataloniyaliklar futbolchiga soliqlardan tashqari yiliga 15 million yevro maosh ko‘zda tutilgan 4 yillik shartnoma taklif qilgan.

Soliqlarni hisobga olganda, «Barselona» Rodrining maoshi uchun mavsumiga 34 million yevro sarflaydi. Ushbu chiqimlar, so‘ralayotgan 80 million yevrolik transfer summasi va agentlik komissiyalari bilan birgalikda shartnomaning umumiy qiymatini 210 million yevrogacha oshiradi. Avvalroq inglizlar kataloniyaliklarning futbolchi bo‘yicha dastlabki ikkita taklifini rad etgani ma’lum qilingan edi.

Ta’kidlanishicha, shartnomasi tugashiga bir yil qolgan futbolchilarni arzonlashtirilgan narxda sotib olish amaliyoti o‘tmishda qolgan. Bunday ko‘rinishdagi oxirgi yirik transfer germaniyalik Toni Kroosning «Bavariya» bilan shartnomasi tugashiga 12 oy qolganda 20 million yevro evaziga «Real»ga o‘tishi bo‘lgan edi.